Hum nahi hon gy to dunia

Bastiyon me ik sada-e-be'sada reh jaye gi
Baam-o-dar pe naqsh
tehreer-e-hawa reh jaye gi

Ansoun ka rizq hon gi
be'nateeja chahatain
Khushk honton pr larazti
ik dua reh jaye gi

Ru-ba-ru manzar na hon to
aainy kis kaam k
Hum nahi hon gy to dunia
gard-e-pa ho jaye gi

Khwab k nashy me jhukti
jaye gi chashm-e-tar
Raat ki ankhon me pheli
ilteja reh jaye gi

Be'samar pairon ko choomain gy saba k sabz lab
Dekh lena
ye khizaan
be-dast-o-pa reh jaye gi