Us raah pe jany se pehle
asbaab sanbhaal k rakh lena
Kuch ashk firaq se le lena
kuch phol visal k rakh lena

Ek umr ki mehroomi apne
seeny me chupana mushkil hy
Jab had-E-wazahahat aa jaye
ye teer nikaal k rakh lena

Ek hyrat dil me jhaNky gi
aNkhoN me sitary TaaNky gi
Jo aNso tum pr bhaari hoN
daaman me uchaal k rakh lena

Ek aisi chup taari krna
jese  goyaai se aari ho
Khamoshi k gehwaary me
awazaiN paal k rakh lena

Chehre se khushi saabit krna
jese hr dukh se ghafil ho
HaaN baab-E-takhatub aye to
alfaz malaal k rakh lena

Wo shaam bohat jald aye gi
jo tum ko tum se milaye gi
Us shaam tum apni aahoN se
kuch naGhmy dhaal k rakh lena

Is kaar-E-jahaN ki wehshat pr
jab koi dastawaiz likho
Sb se akhir me kuch safhy
apne ahwaal k rakh lena

Taaeed k san'naty se uTho
tardeed k shoor me aa jao
Ek talkh jawab se behtar hy
ilzam sawaal k rakh lena

Ye khwaboN
zakhmoN
daGhoN ki
tarteeb munasib hy lekin
Is zaad-E-safar me ‘Azm’ kahiN
kuch sadmy haal k rakh lena