پروین شاکر

چاند میری طرح پگھلتا رہا
نیند میں ساری رات چلتا رہا

جانے کِس دُکھ سے دل گِرفتہ تھا
مُنہ پہ بادل کی راکھ مَلتا رہا

میں تو پاؤں کے کانٹے چُنتی رہی
اور وہ راستہ بَدلتا رہا

رات گلیوں میں جب بَھٹکتی تھی
کوئی تو تھا، جو ساتھ چلتا رہا

موسمی بیل تھی میں، سُوکھ گئی
وہ تناور شجر تھا، پَھلتا رہا

سرد رُت میں، مُسافروں کے لیے
پیڑ بن کر الاؤ، جلتا رہا

دل، مِرے تن کا پُھول سا بچّہ
پتّھروں کے نگر میں پلتا رہا

نیند ہی نیند میں کھلونے لیے
خواب ہی خواب میں بہلتا رہا

پروین شاکر
..................
chaand meri tarah pighalta raha
neeNd meN saari raat chalta raha

jaanay kis dukh say dil girafta tha
muNh pe baadal ki raakh malta raha

maiN to pa'ooN kay kaaNTay chunti rahi
aur woh raasta badalta raha

raat galliyoN meN jab bhaTakti thi
koi to thaa, jo saath chalta raha

mausami bail thi maiN, sookh gaii
woh tanaawer shajar tha phalta raha

serd rut meN musaafiroN kay lee'ay
paiR ban ker alaa'o, jalta raha

dil, miray tan ka phool sa bachcha
paththaroN kay nagar meN palta raha

neeNd hee neeNd meN khilonay leeye
khuwaab hi khuwaab meN bahalta raha

Parveen Shakir