Barish thi
hum thy
or ghani ho rahi thi sham
tum ne liya tha kaanpty honton se mera naam

main ne kaha tha
aao yonhi bheegty chalain
in raaston me dair talak ghoomty chalain

meri Qamar me hath ye pholon sa daal kr
kaandy pe mere rakhy raho
yonhi apna sir

hathon ko main kabi
kabi baalon ko choom lon
dekho meri taraf to main ankhon ko choom lon

pani k ye jo phol hain rukh pr khily hoe
in me dhanak k rang hain
saary ghuly hoe

hont se inko chunty rahain
khush-dili k sath
taary humain talash krain chaandni k sath

yonhi kisi darakht k neeche khary rahain
Barish k dair bad b lipty khary rahain

tum ne kaha tha
aao chalain
raat aa gai
dil jis se darr raha tha wohi baat aa gai

beety samy ki ki yaad hi raston me reh na jaye
ye dil kahin wisaal ki baarish me beh na jaye

kuch dair ek chup si rahi darmiyaan me
girhain si jese parny lgi hon zabaan me

yak'dam gira tha phool koi shaakhsaar se
dekha tha tum ne meri traf iztarar se

baarish me bheegty hoe jhoonky hawa k thy
wo chand be'gumaan se lamhy balaa k thy

nasha sa ek chaaron traf phelta gya
phr us k bad main ne tumhain kuch nahi kaha